ألف ياء – جريدة العرب منبر إعلامي تقدمي يلتزم بقضايا الطبقات الشعبية فلسطينياً وعربياً وأممياً ولترسيخ مبادىء الحرية والمساواة والعدالة الاجتماعية والتقدم والسلم العالمي
مقالات مشابهة
مبارك يرد على أحمد فؤاد نجم
بتشكي لمين يا شيخ جنازة
على أيه والعها تلاتة فازا
داير توأوأ.. تقول دجاجة
لا عين تشوف.. ولا عقل طازة
هو انتَ فاكر عملت حاجة ؟
ماحْنا.. أنا وانت وهُمّه
طلعنا خيبة.. كذاك الأمّة،
طلعتِ فالصو لا المال حدايا
وم الضرب سْكِت وحِكْيِت قفايا
وحضرة جنابك فرحان تدندن
على أيه يا خايب.. ما تروح تشوف
على الله تفهم أيه الحكاية
وتجيب لنفسك حَلِة كُسوف.
شايفني نازل ؟.. طب مين حيطلع
ده مصر غلبت ولا هوّ نافع
وكل شارع من فوقه شارع
وكل طالع من فوقه طالع
بيروح.. وييجي مطاوع
والثورة طلعت شوربة كوارع
لا كوسا محشي ولا شوارمة
والشعب صاحبك روّح جعان
ولا حد كلها غير ابو عمة.
هو انت فاكر.. قلت حاجة ؟
فرحان يا اخويا إني اتعزلت ؟
أنا عايز ايه بعد اللي خدت
العمر ولّى والموت تجلّى
وقربت مِيّة وما يوم خضعت
سرقت ياما.. ولهفت ياما
وحوشت ياما..وكله عندي..وانت اتنشلت.
بحب بابا وبحب ماما
وبحب تيته وبحب مصر
واكره أوباما
والعمر واحد والرب واحد
والدنيا زفة وعروسة خفة
وغناوي هايفة
بيأكّلوها للمحرومين.
وانت اللي وحدك
يا ابو لقمة خايفة… وغنوة سكر… إللي اتنشلت.
دول كبروها وزغِروها
ودينوها وعسكروها
وطنطووها وأمركوها
بعقد شرعي.. مافيش سفاح،
نكاح بحقه
لا حد يفتح بالسوء بقه،
الأئمة تشهد واحاديث صحاح.
لا حدّ يسرق.. العمة عصمة
والمال جميعه لله مباح،
والفقر زينة والشغل وافر
والله أكبر على كل كافر
يحسد عنعمة من باب وسيع:
تتجوزيني يا حجة ” نعمة ”
مالك ومالو خليه بحالو
يتعب ويشقى
حرام عليكي الجمال يضيع.
دانا سري باتع روحي اسأليهم
وبيندهولي يا شيخ ” تحرر”
ويدلعوني التلاتة فيهم
سمّوعة واسمي ” عبد السميع”.
وبكره تسمع بالدو- قراطية
طنطاوي نيلة.. وعبد البديع،
فين البجاحة، ما تقول لشعبك
بغنوة واحدة
إنو العساكر حايضيعوهم
والشيخ ” تحرر ” واقف يبيع ؟
هي الفصاحة وفن البجاحة عاللي يِرُوح ؟
ما تقول عليهم، خلينا نسمع،
تضرب بميت مليان جروح ؟
ده مصر غلبت لا حد ساكت
ولا حد فيها تفهم عليه.
أنا كنت خاين ولسه خاين
ما تقوللي إنت يا عمّ أيه ؟
ده مصر طين بناس ومية
وأطفال جعانة.. ما هيش تكية
وألفين جامع عدا الحسين
والست زينب والحاج مرسي
والشيخة ” رايحة “والشيخة “جية ” وام لحافين
ناقصها أعمى وعميا وعمامة
وعميل بصلي .. ناحية واشنطن يا مسلمين ؟
عملت ايه يا حاج ” ثائر ”
سكت ليه يا ابو الغناوي الملعلعين ؟
أنا كنت خاين ولسه خاين بس انت خاين
وهوّ برضه وهيّ شرحه.. ما تقول آمين
مين اللي خانكم .. وغم بالكم، وكل عيالكم من الف عام،
غير الأئمة…والمستئمة… واهل الطريقة… واهل الكلام ؟
يا ناس يا عالم…مين كان يصدق
إنو التحرر .. نشيل مبارك ونجيب شيطان ؟
دي مش محطة
من كفر شيما لحد طنطا،
دي رحلة فيها اللي كان ما كان.
دي الثورة سكة.. مش نص لفة للطهقانين،
واللحية هيّ الخراب بحاله
لا هيه سنة ولا هيه دين.
دول حزب جدك وجد جدك
من عهد آدم لابو العينين.
ياكلوها والعة ويقولوا ألله
يرزق ويحرم
والفقر جُنّة ونعمة منو
قوموا اشكروه يا شحاتين!
يا رب فقرك.. عايزين ثوابك..تغنينا ليه ؟
طب خد يامرسي!
نقرش ولادك بحاجة حلوه
زي اختهم..واسأل عليّه أسأل عليك.
يا رب ترزق .. نِعين شحاته
نجوزوه بنت الفطاطري
ونتوب إليك.
وتقول عليّه أروح جُهنم
طب عيب عليك!
النار وسيعة.. وما فيش أماكن
ده الشيخ ” عُمارة ”
سبعين عماره، والأجرة نار،
يارب تلقى بدروم وتسكن .. بدون أجار.
وعيت يا قفة ؟
يابو عقل شِفة
كلمة شمال وكلمة يمين،
إنو التحرر مش زار ووصفة
أخرج يا “مين؟” وتعال يا “مين؟”.
حا تغيروني بالشيخ ” جيفارا ”
ليه الغباوة ؟
أنا لسّه واكل .. وهمة لسّه متشمرين.
قوم يا “حتاته “.. وسّع لعمك،
حاتورّثوها كمان عيالكم..
وانتو اللي قمتو.. ضد الوراثة يا شحاتين ؟
بالله تلاته.. لنتم حاتبكوا إني اتعزلت.
وجاي تزلغط بالأمريكاني،، يا شيخ جنازة..ياللي تهبلت
زلغط عكيفك.. شهرين تلاتة.. وكل حاجة.. حاتبان وتعرف..
إني خلاص،
شبعت دنيا.. وفلوس ما تخلص.. وحا يدفنوني جنب السادات
وانت المناضل.. أبو لقمة خايفة.. وغنوة سكّر .. اللي تنشلت.
